طبق فول أجتماع شباب الراعى الصالح الخميس 5/3/2015

فقرات الاجتماع :

أول حاجة الاستقبال
جبنا فراولة و حطينا أرقام التمبولا على فول أخضر

*الصوم فى الكتاب: (أ/مينا جورج سعد)
-أول حادثة صوم فى الانجيل---> أدم و حواء
لما ربنا قالهم متكلوش من شجرة معرفة الخير و الشر
-موسى صام أربعين يوم مرتين مرة عشان يستلم لوحى الشريعة و المرة التانية بعد ما كسرهم كان لازم يصوم عشان يطلع ياخدهم تانى

-لما داود زنا و ربنا قاله ان ابنك هيموت.صلى و صام

1-الصوم توبة:
يهوديت صامت كل أيام حياتها
2-الصوم قبول:
بالصوم ربنا بيدينى نعمة فى عيون الناس
أستير صليت و صامت هى و شعب بنى اسرائيل عشان ربنا ينقذهم من مشورة هامان
3-الصوم خلاص:
يهوشافاط صام و صلى لما كان فى جيش هيجهم على شعب بنى اسرائيل
"فخاف يهوشافاط و جعل وجهه ليطلب الرب و نادى بصوم فى كل يهوذا" (2 أخبار 3:20)
4-الصوم ادخال الله فى الاختيار
"و بينما هم يخدمون الرب و يصومون قال الروح القدس افرزوا لى برنابا و شاول للعمل الذى دعوتهما اليه" (أع 2:13)

طريقة تدميس الفول:
مع الشيف فولى (أ/أسامة حلمى)
-المقادير:
1-نص كيلو فول
2-ازازة مية
3-دماسة

*طريقة العمل:
هنحط الفول فى الطبق و نحط عليه مية عشان يطرى
المية ترمز للروح القدس أو كلمة ربنا
1-انقع نفسك فى كلمة ربنا:
اقرى الانجيل لو مش بتقراه أو كتر من قرايته لو مواظب عليه
كل لما نقرى كلمة ربنا بنستحضر روح ربنا فينا
2-هنكب الفول فى الدماسة (القدرة):
خش جوة بطن القدرة لو عايز صيامك يبقى ناجح زى يونان لما كان فى بطن الحوت (المخدع)
3-حط الفول على نار هادية:
النار الهادية دى اللى يشعلها فينا المذبح
احضر قداسات على طول كل أسبوع و لو مواظب احضر كذا مرة فى الاسبوع
4-أوعى تحط مية ساقعة على الفول:
أوعى تسمح للمية الساقعة تخش تبوظ كل حاجة حلوة عملتها زى النت و الفيسبوك
خلى المصادر اللى داخلالك مية سخنة جاية من عند ربنا

أبونا دانيال:
ليه مش بناكل سمك فى الصوم الكبير؟
المفروض الصوم بجميع درجاته مفيهوش سمك عشان نوصل لدرجة روحية عالية عشان السمك زى اللحمة و الفراخ
و سمح بأكل السمك فى بعض الأصوام تسهيلا على الناس
عندنا سبع أصوام على مدار السنة:
1-صوم الميلاد:43 يوم.فيه سمك ماعدا الاربع و الجمعة و برمون الميلاد
2-برمون عيد الغطاس:مفيهوش سمك
3-صوم يونان:3 ايام.مفيهوش سمك
4-الصيام الكبير:55 يوم.مفيهوش سمك
5-صيام الرسل:فيه سمك ماعدا الاربع و الجمعة
6-صيام العذراء:15 يوم.فيه سمك ماعدا الأربع و الجمعة
7الأربع و الجمعة:مفيهمش سمك

تداريب الصوم:
1-انقطع---> عن الأكل
2-اقتطع---> وقت للفايدة و اقضيه مع ربنا
3-اقطع--->أهوائك و شهواتك (مزق قلبك)
أعرف أقول لأ لحاجة عايزها حتى لو مش غلط زى النت و الفيسبوك عشان أقوى ارادتى
4-طع--->الوصية (أب اعترافك)

فى الأخر:
-الصوم لازم يكون عملى مش نظرى يعنى مش مجرد تغيير فى نوع الأكل بس
-الصوم طريق للاستمتاع بالحياة مع ربنا
-منضيعش بركة الصوم و نستفيد منه على أد ما نقدر

جايزة التمبولا اللى قلنا انها مفاجأة كانت قدرة فول صغيرة عشان ندمس الفول فى البيت

عملنا سحب التمبولة فى اوقات مختلفة من الاجتماع
كيسين بطاطس فارم فريتز واحد للولاد و واحد للبنات
أبونا دانيال سأل سؤال عن الصوم و الجايزة كانت خمسة جنيه

بنشكر كل الشباب و الشابات اللى اهتموا و جم حضروا الاجتماع
عدد الحضور كان كبير و الاجتماع نجح بيكوا و كلوا روح مبسوط بسبب روحكوا الحلوة و حماسكوا
انتظرونا الاجتماع الجاى و انتظروا مفاجأتنا و اللى جاى أحلى 

طبعا أهم حدث فى الاجتماع كان عربية الفول و وقت الأكل
كل الناس كانت جعانة و عايزة تاكل و قضينا وقت حلو مع بعض و اكلنا مع صحابنا
و اليوم ده بجد عمرنا ماهننساه